Hannde e alkamisa ñannde 25, 12ɓuru, hiɗen hewta Marok, kaalen fii ngoo foolotiro fuku-koyngal CAN 2025 fuɗɗiingo gila e alat yawtuɗo. Dawal aranal foolitiro ngoo timmii hanki e alarba. Diɗɗe 24 ɗen fof fijii tiindondire mum arane ɗen. Gila e tiindandiral hakkunde Marok e Komoor udditungal foolotiro ngon, rewri e kawrite Mali e Zammbiya, maaɗum Senegal e Boswana, Burkina Faso - Guine Equatorial, haa e Cote d’Ivoire - Mozambik e kawrital ngal hakkunde Kamerun e Gabon, alhaaliiji buy taskaama e ɗee pottite.

Aljeriya, parleman on wootii sariya  tawnuɗo  kolonankaaku  e boneeji dawla hanki alarba ñannde 24 ndu lewru 12buru . ko laawol tataɓol ngol nii o sariya no weeñe e yeso sardiyankooɓe . On sariya no addi hallulaji buy nder ɗee pelle politik leydi France. heɗitoɗen jantoore Mamoudou JALLO

E nder jonnde ,  ndee fedde  blogeerɓe  Gine,  nodirteende  "ABLOGUI"  wondunde e kawtital daraniingal hakkeeji neɗɗo (CODDH)  kañum  sendika gollooɓe e baŋŋe jaaynirde (SPPG) siifii  hollitol mettu -ɓernde e batte ɓittingol golle  jaaynirɗe  e dow internet . Nden jonnde waɗii ñannde 23 lewru 12ɓuru hitaande 2025. Siifuɓe ɓen  hollii mette-ɓernde e batte ngol sukkugol  taƴugol  internet e nder leydi ndin , tentinii e saa'i ɗe woote subngooji hooreejaaku Gine .  E bi’ol maɓɓe ɗum ɗoftaaki ndimankaaku  jaaynirɗe . Heɗitoɗen Mamadou Haadi e faandu haala Mamuudu JALLO 

Guinee, leydi ndin no fewndii e saa’i ɓurɗo e hitunde ka baŋŋe dawro. Ginenaaɓe ɓen wootay ñannde 28 nduu lewru ɗoo. Ɗum ko e ɓawto suɓagol oo sariya keso. Ngoo suɓngo ɗoo ko laawol artirgol demokrati e nder leydi ndin. Kono en anndinay wonnde ɗii wooteeji no waɗude e ɓaawo ɗee pelle politik lumndiiɗe laamu jogiiɗe cemmbe. Ɗum ko wano UFDG, RPG e UFR. Oumou BAH no yillititanoo on e oo alhaali suɓungooji.

Kawtital renndingal leyɗeele AES fampike suudu marirndu kaalisi wonndude e konu maɓɓe kafaangu e ngoomu meja jooɗiingu e ɗee leyɗe tati kala. Faale maɓɓe ko tippugol e ɗee eɓɓooje ngam simmbingol ndee fedde AES. E biol maɓɓe golle heewɗe waɗaama gila ɓe sinci ndee fedde, kono fanni ndeenaagu tabitaali hay huunde gasata. Taw si nguu konu maɓɓe kafaangu waawan artirde jaam e nder ɗee leyɗe sahel ? Ko holɗum ɗii aalaaji maɓɓe kesi battinta e ngurɗam ɓiɓɓe Mali, Burkina Faso e Niger ? Koɗo men hannde ko Mamadou Oumar Ly hertorɗo leyɗe Sahel. Himo jaaboo lamnde Ibrahima Timbi Bah.

Algerie, suudu sarɗiyannkooru leydi ndin ndin suɓuke hankin eɓoore sariya. Nden ko anndinnde njagguuji ɗi France fawaynoo e dow Algerie e hitaa 1830-1962. Ɓe ƴamii Paris yaafinagol e battane ɗin fitinaaji. Ngal pellital yanii e saa’i mo tawata nanondiral ɗuuɗaa hakkunde ɗee leyɗe 2. Lurre diplomatik no jokkii hakkunde Alger e Paris. Oumou BAH

Senegal, ko famɗi fuf, yimɓe sappo e ɗiɗon maayii e yoolagol laana maɓɓe, ɗum waɗi e bannge hirnage Senegal e Joal. Cappanɗe taton woɓɓe faabaama, ɗuuɗuɓe  emaɓɓe yiitaaka. Ka laana ana rondinoo ko fotta yimɓe teemeɗe ɗiɗon, wonooɓe e laawol ɗanule ɗe ngalda e sariya. Minati JALLO.

Hannde en njeewtan e dow tiiɗallaaji tayketeeɗi e gollirɗe men Afrik laanaaji diwooji . E ko tayka, ɗee gollirɗe wakkati fuu eɗe tawdee e tiiɗalla. Ko yontinta faa yoga e majje udda. Holko woni sabaabu ɗii tiiɗallaaji ? Holɗum waawi waɗeede faa ɗee caɗeele ŋotta ? Holɗum jaati waawi laataade darnde ardiiɓe leyɗe ɗee e jogola lobbo ɗee gollirɗe e yaarugol majje yeeso. En njaɓɓoto Abdoul Kadiri Diallo, oo ingénieur dunke kala ko háɓɓodii e laanaaji diwooji.

Hannde ko juulde isaayankooɓe woni Noel, nde fayɓe ɓen habbii heɓugol fandaari ka ley leggal Sapin. E gure laddeeri heewuɗe juulde nden, ko seeɗa tun welo-welo ngon waɗata. Wano ka huɗo Tafiire hirnaange nano leydi koddiwaar, ka juulɓe ɓuri ɗuuɗude, heɓugol fanda weeɓa, coggu goɗɗi goo no satti. Mawɓe fayɓe goo no etaade ka woɓɓe goo ronki. Jantoore mawnde Abdoul Aziz Diallo…

Alarba hanki, diɗɗe jeyaaɗe e guɓɓe E e F pettii pottite maɓɓe gadane. Pottite muusɗe no feewi hono no ngal Burkina e Guinée Equatoriale. Ko ɓeen Etalons en keɓi poolgu e dow Guinée Equatoriale e silimaaji cakkitiiɗi ɗii, 2-1. E nder guɓɓal F ngal, Algérie foolii kippu Soudan loggi tati e ɓolum (3-0). Suutɓe deesewal jawtungal ngal Côte d’Ivoire kañum ne heɓii poolgu gooltel e ɓolum e dow Mozambique. Ko hono nguun poolgu kadi Cameroun heɓi e dow Gabon. Umaar Mammadu SOH, jahanɗo RFI Fulfulde to Maroc, ina siimtana en ɗee pottite

Follow all the headlines and breaking news from RFI live on Facebook and Twitter: @RFI_En

Losko faatungo e etagol samminere laamu waɗnde ñande 7 lewru nduu ngonɗen to Benin ina jokki. Gooto e sarɗiyankooɓe luulndiiɓe ɓee, Sounon Bouké, tawaaɗo e fedde  demokarat en, fawaama junngo. E ndee yontere faande, o nawete e yeeso sariya. E kabaaruuji keɓaaɗi ɗii, o sarɗiyanke tuuma ko noddude telɓinere deeƴre laamu e noddude murtere. Muussa Uamar Bari

Guinee E baŋŋe yungugol (awo) liƴƴi leydi ndin hino joggiti noone ɗuuɗuɗe ka maayo. Kono ka luumooji liƴƴi hino fanɗi. E wi'ee gollayɓe e ɗe baŋŋe ko sattini coggu liƴƴi ɗin, ko yungortooɓe batooje njane tawde ɓe naɓay ɓe yeeya ka leyɗe njane, hara ɓe addaali ka lumooji leydi ndin.

Alarba ñannde 24 lewru 12ɓuru, en kaalii hannde fii ndee jonnde ɗiɗaɓere Dawlaaji Leyɗe AES. Hooreeɓe Mali, Burkina Faso e Niger hombii hanki jonnde maɓɓe ngal ɓalɗe ɗiɗi nde ɓe yuɓɓini to Bamako. Faandaare ndee jonnde ko e alhaali semmbinde jokkondiral e gollidal hakkunde leyɗeele maɓɓe tati ɗee to bannge ndeenaagu e ɓamtaare, ina wonndi e ndaartugol golle ɗe ɓe laatini gila ɓe sinci ngal kawtital AES.

Guinee , yimɓe 70 wonii ko warra e nder laamu fadde ngu general Mamadi Doumbouyah ardii , tawa tefooree wooteere udditaaka . Ko ɗum ,nde fedde susete siwil « Tournons La Page » holli nder cimtol mun noddiraangol « chasse à l’Homme ». Nde fedde holli wonnde burɓe e ɓen warano e nder seppooji lunndiiɓe ngun laamu faddewu . Heɗitoden Alseny Farinta CAMARA, tawaaɗo e nde fedde TLP- Guinée ka faandu haala Mamoudou DIALLO

Benin : Talaata hanki, hooreejo leydi ndii waɗi yeewtere mum sakkitiini ko faati e laamu makko, faade ɓiɓɓe leydi ndii. Wonnoo ko e yeso depiteeɓe kono  kadi e imminaaɓe ɓiɓɓe leydi ndii. Patrice Talon, hollii no yiiri joggugal leydi ndii, duuɓi 65 caggal ndee ɓe keɓi jeeytaare maɓɓe. O anndinii wonde leydi ndii yiiti damal ngam ɓamtaare mayre…O ɓuriteentinde yeewtere makko ndee ko e ngotaagu ngenndi ndii e deyre mayre. Boly BA

Simandou 2040, ko eɓɓoore mawnde nde laamu Guinée darni ñande 11 lewru sappo e gooɓuru ndee hitaande, caggal golle keewɗe gila e hitaande 2023. Faandaare ndee ko naftoraade jamɗe iriiɗe e ndee nokkuure wonnde hakkunde diiwaan Zerekore e Kankan. Wattude ndee ñiiɓirde oogirɗe ɓulndu ngalu ngam waylude ngonka ɓiɓɓe leydi Guinee. Ɗum maa waaw ɓeydude golle, feewnitde leydi ndii e mahanteeje keewɗe. Kono weltaare won heen, ina wona sahaa sunaare woɗɓe. Ndee eɓɓoore Simandou ina addi caɗeele keewɗe e nder taariindi ndii, nokkuuji taariiɗi ñiiɓirde ndee, gila e leydi ndemateendi, diƴƴe, pooɗe deenaaɗe, haa e weeyo ngoo. Ngam yeewtude e oo alhaali, eɗen njaɓɓii hannde Mamadou Lamarana Diallo, gooto e gollooɓe e Action Mine de Guinée, fedde nde wonaa laamuyankoore haɓantoonde fodde renndo ngam falaade torlaaji oogirɗe.

To Guinée, yimɓe puɗɗiima huutoraade laawol kesol bi’ateengol "Echangeur de Bambéto", gonngol e nder wuddu Conakry, komin Ratoma. Ngol laawol peccingol e laabi tati weeɓtinii yah-ngarta yimɓe ɓee. Caɗeele gasanii ɓeen huutortooɓe ngol laawol. Ɓe kollii weltaare maɓɓe. Mammadu Aadama JALLO

Guinee, ko balɗe tati heddanii ɓee kanndidaaɓe njeenayo (9) e ɗii suɓngooji hooreyaaku saatiiɗi ñannde 28 nduu 12ɓuru, ngam fammingol Ginenaaɓe eɓɓooje maɓɓe. Heewɓe e ɓee kanndidaaɓe hino jokki yiilagol e nder leydi ndin gila ngal orngal fuɗɗi. Kono Général Mamadi Doumbouya, hooreejo laamu faddewu ɗuuɗaaka yi’eede e ngal oorngal, ɗum non hay so tawii ko yimɓe makko e nate makko wona e ɓureede yieede e maggal. Ko holɗum maandete e ngal oorngal ? Holko saabi ngal heewaani yimɓe wano oorɗe woowuɗe ɗee ? Koɗo men hannde ko Mouley Ismaël Diallo, hertorɗo sariya e dawro. Himo jaaboo e laamnde Ibrahima Timbi Bah.

Caggal nde ɗe keɓi poolgu mawngu e dow Botswana, barooɗe leydi senegaal ɗee puɗɗoriima ngoo foolotiro no feewiri. Kippu Senegaal oo fooli-ɓe ko loggi tati e ɓolum (3-0). Ko Nicolas Jackson loggi ɗiɗi (2) e Cherif Ndiaye. Nde pottital ngal gasi ndee, Pape Alassane fettiyaŋke Senegaal hollirii weltaare mum. Kadi o anndinii wonnde maa ɓe keblanoo pottital hakkunde maɓɓe e RD Congo.

To Mali, jonnde dental AES ɗimmere joofi e kiikiiɗe to Bamako lamorngo Mali. Capitaine Ibrahim Traoré, hooreejo Burkina Faso suvaama lomtaade general Assimi Goita e gardagol dental AES ngal e ndee hitaande aroore. Ɓee hooreeɓe leyɗeele Sahel tati eɓɓii golle keewɗe hanki hono udditde suudu baŋke AES kañum e tele e radio fedde ndee. E tiimmode ngal kawrital, ɓee hooreeɓe AES podii ɓeydude jokkondire maɓɓe e fannuuji keewɗi teeŋti e bannge dipolomasi, sariya e ndeenaagu. Minati JALLO

Follow all the headlines and breaking news from RFI live on Facebook and Twitter: @RFI_En

Ko Nicolas Jackson loggi ɗiɗi ina wonndi e Cherif Ndiaye.

Alhaali faggudu, ko ɓuraa  mantineede e hitaande 2025  e baŋŋe faggudu ko ɓeydagol saggalle duuwan ɗe Amerik fawi e dow leyɗe keewɗe winndere ndee. Ko e 7 lewru 8ɓuru hitaande ndee, pellital ngal laatiinaa. Pellital nawrungal dental leyɗe Orop e yoga e leyɗe goɗe windere nde.E gardagol Donald Trump, ɗen sagale ɓeydaaɗe dillinii ngeyngu e nder majje, imminii fitinaaaji, kadi addi kullol e nder leyɗe keewɗe Afrik. Boly BA

Talaata hannde 23 lewru 12ɓuru, yeewtere men no nawra en to Koddiwaar nokku to oorngal suɓngooji sarɗiyaŋkooji njokki. Gila yontere faltiinde ndee, kanndidaaɓe e ɗii sarɗiyankooji yuɓɓinteeɗi ñande aset aroore, 27 lewru ndu wonuɗen, no yiilaade e nder denndaagal ca’e e koɗooli leydi ndii ngam noddude ɓiɓɓe Koddiwaar ɓee wootangol fedde maɓɓe dawro. Kanndidaaɓe 2.740 foolotiray e ɗii sarɗiyankooji fii julle 255.