Nas cada vez máis raras ocasións nas que o tempo anuncia neve na zona, debemos fixarnos na cota: se esta é de 300 m, probablemente calle a neve en Aiazo. Se é de 400 m, como moito veremos auganeve.

Lindando con Pasarelos (Oroso), o Alto de Penedos (360m) é a máxima cota en Aiazo, e menos de 300 metros ao sur está, tras unha pendente moi pronunciada, a cota máis baixa, na beira do Tambre, de arredo dos 265 m. Destaca tamén no leste o Coto dos Cregos, de 351 m, ao lado da Estrada comarcal.

Caso a parte é Liñares; aldea de tres vivendas que apareceu en torno á estrada no norte de Aiazo. Nunca se considerou como parte de “A Carretera”, Vilanova ou Novavista, pola forza do topónimo tradicional anterior. De xeito oficial é parte de Fontelo.

Para os organismos oficiais como o INE ou Correos, que simplifican a complexidade territorial galega en poucos lugares ou núcleos, as casas da estrada pertencen dependendo da súa altura a Fontelo, A Torre ou Fonsá.

Eran nomes utilizados na súa versión galega ou castelanizada (Villanueva de Ayazo/ Nuevavista) durante os anos 50, 60 e 70. Desde os 80 a tendencia foi a empregar simplemente “A Carretera”.

Vilanova recibiu ese nome ao apareceren as primeiras vivendas con taberna en torno á nova estrada alí: a do Muiñeiro e a de Aurelio. Máis tarde as primeiras casas na estrada ao norte de Fonsá (a de Carmiña e a de Díaz), nun lugar elevado e con vistas ao resto de Aiazo, darían lugar a ‘Novavista’.

Porén, durante gran parte do século XX distinguíanse núcleos diferentes na estrada: Vilanova ou Vilanova de Aiazo, ao norte de Fontelo, e Novavista, ao norte de Fonsá. En mapas detallados de toponimia aparecen recuperados ambos. Desapareceron durante anos e agora comezan a ser máis usados.

Segue triunfando o xogo do #tiro, que apareceu como novidade da Directiva da AVV o pasado San Pedro.