اصبحت رسميا عجوز ؟
العضمة كبرت
او يجوز
ما بقتش احوز
مقدار مناسب م الامل
كافي اني اعيش
خدها بساطة
او بطيش
من خرج م الدنيا حي

عبيط
سكرت
من غير ما تشرب المحيط
وانا مازالت تفحت في موجه
كأن قلبك
في الاصل دودة
ف طور خروجه
يصبح فراشة
خارج ضلوعك
وانك بتظهر ف قوة
قلبك مازال في غاية الهشاشة
وقادر
ميبقاش في طوعك
انك مازالت محكوم بجوعك
تبدل مشاعرك
بكيلو دينيس
طحينة زيادة
وقلبك طحين
تنسي للحظة كونك طخين
وتاكل وتشبع

هذا الحنين جارف
هذا الحنين كارف
بيقلب الأحزان
و الحزن بالإمكان
نحكيها كان ياما كان
كل الحاجات خلصت
من غير ما نبداها
مكنش بنا وعود
علشان نصدقها
ولا حاجة نخسرها
علشان ما نخسرهاش

طعم الدنيا معاكم غير
طعم الخير
زي السكر
فوق الكحك في بق العيل
باقي الناس في الأصل وشوش
يشبه قهوة
بنها مغشوش

كل ما اجمع شمل قلبي
قلبي يفرط
زي سبحة
ناقصة حبة
كل حبة تقل حبة
قلبي متعلق بخيط
طرفه سايب
قلبي كان م الحزن دايب
زي عيل بس خايب
قلب شايب
قلب عايب
شعر دقن حزنه ابيض
وبرضه بضحك
حزني مضحك
حزن ماجن
قلبي عاجن حزني يجي الف مرة
زي تبغ تقيل و مرر
بس عادة
قلبي قرر
لو هيشرب حزن تاني
يبقي سادة